निस्वार्थता – एक जीवन शैली

स्वतचं अभेद्य कवच आणि कुंडल धारण केलेला असा मृत्युंजयी योद्धा होता तो… इंद्र देवालाही भिक्षा म्हणून मुक्तहस्ताने आपले कवच कुंडल दान करणारा क्षत्रिय होता तो… आपण दुर्योधनाला दिलेल्या वचनाला जपणारा अंगराज होता तो… गुरू द्रोणांकडून ब्रम्हास्त्राची शिक्षा नाकारला गेलेला सूतपुत्र होता तो… अलर्क किड्याने आपला पाय पोखरलेला असतानाही आपल्या गुरू आज्ञेसाठी मनावर संयम ठेवणारा आणि शापित ब्रह्मास्त्र धारण केलेला परशुराम शिष्य होता तो… कुंतीमातेला दिलेले वचन युद्धभूमीवर अगदी तंतोतंत पाळणारा पहिला पांडव होता तो… मरण समोर दिसत असतानाही एका गरीब वृद्धाला आपले सोन्याचे सुळे दात दान करणारा खरा दानवीर होता तो… भगवान श्रीकृष्णाला आपल्या संपूर्ण आयुष्यात तीनच लोक प्रिय होती… राधा, देवकी माता आणि… कर्ण… तर असा कौंतेय होता तो…

कर्णाने आपलं संपूर्ण आयुष्य लोकांना सर्व काही देण्यामध्ये व्यतीत केलं आणि त्या बदल्यात कधीच काही अपेक्षा केली नाही…निस्वार्थीपणे सगळं केलं…अगदी सहज केलं दान सगळं… आपण युद्धामध्ये कवच कुंडलाशिवाय कमकुवत होऊ शकतो, हे माहीत असून पण ते ही देऊन टाकलं . तर तात्पर्य असं की कर्णाचा हा गुण आपल्यामध्ये आला तर आपलं आयुष्य किती बदलून जाईल… प्रत्येकाने आपल्या क्षमतेनुसार आसपासच्या लोकांना मदत केली तर किती छान होईल ना… कारण आपण जे देतो तेच आपल्याकडे परत येतं… पण मी म्हणतो, की फक्त पैसेच दान द्यावे अस कोणी सांगितलं आहे का??… एखाद्याला आपले आधाराचे दोन शब्द देऊन तर बघा ना … एखाद्याला आपलं ज्ञान देऊन बघा ना…एखाद्याला आपले चांगले विचार देऊन बघा ना…आणि काहीच नाही जमलं तर एखाद्याला फक्त आपला वेळ देऊन बघा ना…फक्त एखाद्याच नुसतं बोलणं ऐकून बघा… त्याच दुःख ऐकून बघा… आणि हे सगळं करण्यासाठी गरीब , श्रीमंत अस वर्गीकरण असावं असं काहीच नाही… फक्त मदत करण्यासाठी चांगली नियत असावी लागते… तरच खऱ्या अर्थाने कर्णाने केलेलं दान, आत्मसमर्पण, त्याग ह्यांचं चीज होईल असं मी म्हणेन… आणि अजून एक म्हणजे हे निस्वार्थ जीवन जगण्यासाठी वेगळे असे प्रयत्न करावे असेही काही नाही… जसं कर्णाने ते आपल्या रोजच्या जीवनातील छोट्या छोट्या गोष्टींमध्ये करून दाखवलं… तसं आपण ही ते करू शकतो… म्हणजे त्यासाठी आवर्जून असे वेगळे प्रयत्न करावे लागणार नाहीत… आणि मग ती आपली एक जीवनशैली बनलेली असेल… निस्वार्थता एक जीवनशैली …

तर मग एकदा करून बघायला काय हरकत आहे … आजपासून सुरवात करा… अगदी आतापासून… अगदी ह्या क्षणापासून…